لا تجعلي بشرتك ساحة تجارب

خطأ شائع ومنتشر جدا فى مصر وفى بعض دول الخليج والمغرب العربي وهو تجربة الوصفات الشعبية المنتشرة على الانترنت أو فى التلفزيون من غير المتخصصين أو استخدام روشتات الغير أو اتباع نصائح وتجارب الأصدقاء
الخطأ ده مش منتشر بالشكل ده فى الغرب ولا فى لبنان مثلا لأنهم بيخافو جدا على بشرتهم ....
ليه بنقول الكلام ده :
أولا : الوصفات الطبيعية مش دايما صحية ومفيدة وآمنه
فعلى سبيل المثال الليمون والمانجه والفواكه الحامضية والجنزبيل لما بتدخل فى مكونات أي وصفة للبشرة ممكن تسبب تهيج والتهابات واحمرار ممكن يتبعه اسمرار يحتاج لعلاج
كمان أكياس الشاي لما بتتحط على العين بتسبب اسمرار عند بعض الناس وبالتالى بدل ما نعالج الهالات السوداء بنزودها
ده غير ان الوصفات الطبيعية دي كتير بيكون الـ pH بتعها او درجة الحمضية بتاعتها مختلفة عن الجلد فممكن تسبب حرقان أو شد فى البشرة وطبعا الامتصاص بتعها مش مدروس فممكن مايكونش ليها فاعليه من الاساس
ثانيا : اتباع نصائح وتجارب الآخرين و دى مشكلة كبيرة
لأن في بعض الأحيان تأتي الوصفات والتجارب بنتائج ايجابية و ساعتها بتلاقى اللى جربت تبدأ تنصح اصدقائها اللى بيكون عندهم مشكلة تانية غيرها او نوع بشرتهم مختلف عنها أو بشرتهم حساسة ....
وبعد ما يجربو زيها مايحصلهمش نفس النتائج وفى بعض الاحيان بشرتهم تلتهب او تسمر وتكره صاحبتها !!
ثالثا : اتباع بروتوكول العناية أو روشته خاصة بالغير
ممكن صاحبتك تكون كشفت بالفعل عند دكتور وشخصلها الحالة وكتبلها علاج لكن التشخيص مختلف عن حالتك وبالتالى حالتك ليها علاج تاني
وطبعا لما تجربي الروشته بتاعتها بالرغم من انها من طبيب إلا انها تعملك مشاكل وكل ده بسبب التشخيص الخاطئ وحب التجارب
وفى النهاية عايزين نقول ان بشرتك نعمة من ربنا لازم تحافظي عليها ..

شكراااااااااااااا